شوف الدنيا كيف تبدلات .
علاش ادنيا غدرتيني
فكرش مي ليك شوقتيني
تسع شهور و هي كتعاني
ايام و ليالي مادرتهاش بلعاني
*************************
كيف خرجت لهاد الدنيا و انا نتصدم
شي يبوس و شي يسلم
وشي فبالو راني ما نفهم
نهار على نهار كنزيد نتعلم
************************
كبرت و ما كبير غير مولانا
الرحمان الرحيم اللي كلشي عطانا
يا ربي ما بغينا مال ما بغينا قامة
كنترجاو مغفرتك و السلامة
************************
فين ديك الايام ملي كان السلام و الاطمئنان
فين دوك الجوامع اللي كان بنادم منهم ما يصير قانع
فين داك الدين اللي كان فيه بنادم مستقيم
فين دوك الرجال اللي مع الفجر على القمح يتحناو
************************
الوقت تبدلات
و الناس الاحرار تحت التراب تودرات
لا رجال لا عيالات
تاواحد فيهم هاد الدنيا ما خلات
الله يرحم جميع الناس الحيين منهم و الاموات
وباراكا من القيل و القال
راه ميزانكم غادي و كيتقال
**********************
ياهاد الدنيا اللي خديتي لينا الناس الاحرار
ديتي حبابنا اللي ما كنتيش تشوف منهم العار
كل نهار عند جارة فالدار
ما يتجمعوش باش يتسوقوا الخبار
*********************
دايرينها حديث و مغزل
شي يجمع و شي يخمل
وشي فخدمتو كايتفنن
فبالو لتا حاجة ما يخمم
***********************
الخير موجود و الحمد لله
اللي عندهم يقسموه و العاطي الله
نهار الفرح يتجمعو و يباركو لمولاه
ونهار الحزن ما ينساو الخير و يردوه باشما عطا الله
***********************
اش هاد الوقت يا هاد الناس
ولاو ولادك يهزو فيك الراس
ههه بقات فالقرعة و الكاس
قرانك كانو يهزو الفاس
**********************
الجار ما يشوف جارو
ولا يتسوق لخبارو
بحال الى دار جارو ماشي حدا دارو
كلهم خرج عليهم الكارو
***************
الوقت خيابت
والمعيشة غلات
و الخدمة الحلال قلات
فلوسنا ما عرفناها فين مشات
البنت ما بقات تسترات
وعلى لحمها عرات
والولد راسو مزوق بالنخلات
ااااااااش هاد التفليات
بقلم : ايمان ابوضرقة
المشاركات
ليست هناك تعليقات:
إرسال تعليق